Academia Occitana

Pèire Elia

Pèire Elia

Pèire Elia (Tolosa ? – id. 1724).

Artista brodaire, mas aventurièr, foguèt arrestat cap a Agen coma falsmonedièr. Escapat, se trobèt en Espanha dins las jaulas de l’inquisicion. La siá femna, Catarina Cailar, capitèt de lo far desliurar… Per dire que…

Contra las femnas

Le brut agre d’una carrèla,
le cant d’un pol enraumassat,
las granolhas d’un grand fossat,
d’un vièlh aucat la gargamèla,

le son d’un violonàs fendut,
una carreta mal untada,
una pola quan a pondut,
una tropa de gats dessús una teulada,

les corbasses, les agaçats,
le grunhament dels tessons en colèra,
las campanas dels trespassats,
las cadenas d’una galèra,

le bram d’un buau dedins l’afachament,
le potonton d’un batent que trabalha,
d’una banda de lops le furiós urlament,
enfin le terratrum d’una granda batalha,

tot aquò pel segur es mila còps plus doç,
e jo m’aimeriái mai, pel repaus de ma vida,
n’ausir de tots costats que d’aquelas cançons,
que d’entendre a l’ostal una femna que crida.