Jorn per jorn

L'accent

Cresiam que l’afar de l’occitan dins lo metro tolosan èra acabat. E ben non. O puslèu a cambiat de natura. Ara es la version francesa de las anóncias que fa problèma. Pensatz benlèu que d’occitanistas acarnassits la vòlgan suprimir ? Non i sètz pas. Li repròchan un leugièr mas plan evident accent « tolosan » - Murièl qu’es de Conseran ! Lor agradava mai, los repotegaires, la votz mecanica de davant, sense chuc ni muc. Es clar que d’unes aman mai lo país, e o dison, que sos indigènas. Fa longtemps que Franz Fanon aviá observat lo fenomèn, mas aquò rai. Es ja quicòm qu’aquelas gents non gausen pas mai parlar de l’occitan. O alavetz per çò que nòstra amiga, en occitan, d’accent n’a brica. Doncas aquí la vertat : l’occitan es la sola lenga al mond que parlam sense accent. Aquò fa soscar.

J.P.