Academia Occitana

August Benaset

August Benaset

August Benaset (Vilafranca de Roergue 1868 – id. 1953)

La nèu !

(1926)

La nèu, la nèu, coma un redòl
de blancs e mofles flòcs de lana
que d’en amont naut se debana,
l’aigosa nèu tomba pel sòl,

e dins un fregeluc lençòl
acaptant lo puèg e la plana,
del castèl jusqu’a la cabana,
tot lo campèstre met en dòl.

Vilafranca, ont res non bolèga,
dins la nuèch blaima se ramplèga ;
lo cloquièr se cluja de glaç,

e de sa campana enraucada,
las oras tristas coma un clas
tombon sus la tèrra emblancada.